Tilbúin að verja ríkisstjórnina falli

Þingmenn Hreyfingarinnar eru tilbúnir að verja ríkisstjórnina falli takist samningar um framgang ákveðna mála sem flokkurinn telur brenna helst á þjóðinni. Þau Þór Saari, Margrét Tryggvadóttir og Birgitta Jónsdóttir funduðu í gær með Jóhönnu Sigurðardóttur og Steingrími J. Sigfússyni, formönnum ríkisstjórnarflokanna eftir að þau sendu þeim bréf um hugsanlegt samstarf.

Þau mál sem Hreyfingin telur mikilvægust um þessar mundir eru meðal annars þjóðaratkvæðagreiðsla um tillögu stjórnlagaráðs að nýrri stjórnarskrá, persónukjör, leiðir til almennrar skuldaleiðréttingar og afnám verðtryggingar, sem og framtíðarfyrirkomulag fiskveiðistjórnunarkerfisins.

Takist samningar um þessi mál er Hreyfingin tilbúin að verja ríkisstjórnina vantrausti komi til þess.

Tilkynningu Hreyfingarinnar má lesa hér fyrir neðan:

Í gær áttum við ágætan fund með Jóhönnu Sigurðardóttur og Steingrími J. Sigfússyni, formönnum ríkisstjórnarflokkanna. Þar ræddum þau mál sem helst brenna á þjóðinni, þar á meðal þjóðaratkvæðagreiðslu um tillögu stjórnlagaráðs að nýrri stjórnarskrá, persónukjör, gagnsæi, upplýsinga- og tjáningarfrelsi, leiðir til almennrar skuldaleiðréttingar og afnám verðtryggingar, sem og framtíðarfyrirkomulag fiskveiðistjórnunarkerfisins.

Til fundarins var boðað af þeirra hálfu í kjölfar bréfs sem við sendum þeim um hugsanlegt samstarf um umrædd atriði. Að okkar mati kalla þær aðstæður sem nú ríkja í samfélaginu á aðgerðir að hálfu stjórnvalda og ábyrga afstöðu minnihlutans.

Takist samningar um framgang ofangreindra mála lýsum við okkur reiðubúin að verja ríkisstjórnina vantrausti komi til þess. Við höfum aldrei heitið ríkisstjórninni stuðningi gegn vantrausti en höfum stutt öll góð mál óháð uppruna þeirra. Það er að okkar mati löngu tímabært að ríkisstjórnin forgangsraði með ofangreint í huga og forsenda þess að hún að sitja út kjörtímabilið. Okkur finnst brýnt að niðurstaða liggi fyrir í þessari viku.