Ógnaði björgunarsveitarmanni sem þurfti að flýja inn í bíl

Ófærðin fer illa í suma sem sannaðist í Reykjanesbæ í morgun þegar ökumaður veittist að björgunarsveitarmanni og ógnaði honum. Björgunarsveitarmaðurinn sá þann kost vænstan að flýja inn í bíl og læsa að sér og þá barði maðurinn í rúðuna. Þetta kemur fram í tilkynningu frá Landsbjörgu. Að lokum var lögregla kölluð til og skakkaði hún leikinn.

Björgunarsveitarmaðurinn var að manna lokunarpóst við Fitjar en Reykjanesbrautin var meira og minna lokuð í allan morgun. Snjóplógur lagði síðan af stað eftir Reykjanesbrautinni og fékk Flugrútan að fylgja í kjölfarið ásamt fleiri aðilum sem lögreglan mat sem svo að þyrftu nauðsynilega að komast til Reykjavíkur.

Öðrum var gert að bíða og það sætti einn ökumaður sig engan veginn við og ógnaði þá björgunarsveitarmanninum. „Slysavarnafélagið Landsbjörg vill koma þeim tilmælum á framfæri að fólk sýni skilning á störfum björgunarsveitafólks sem er að aðstoða samborgara sína í erfiðum aðstæðum, endurgjaldslaust, og ógni ekki öryggi þess á meðan það reynir að tryggja öryggi annarra."

Hægt er að horfa á myndband hér fyrir ofan sem myndatökumaður Stöðvar 2 tók af ferð bílalestarinnar frá Reykjanesbæ til Reykjavíkur í nótt og í morgun.