Zia Mahmood spilar á Bridge-hátíðinni í Reykjavík

Einn kunnasti briddsspilari heims, Pakistaninn Zia Mahmood, er meðal þátttakenda á Reykjavíkur Bridge-hátíðinni, sem nú er hafin á Hótel Loftleiðum. Forseti Íslands, Ólafur Ragnar Grímsson, setur mótið formlega klukkan 19 í kvöld.

Briddshátíðin, sem að þessu sinni heitir Iceland Express Reykjavík Bridgefestival, hefur verið haldin ár hvert síðan 1982. Þetta verður ein fjölmennasta bridgehátíðin til þessa. Alls spila rúmlega 300 manns á mótinu og koma spilarar víðs vegar að úr heiminum. Má þar nefna þýska landsliðið í opna flokknum og tvo spilara úr landsliði Bandaríkjanna. 74 sveitir eru skráðar til leiks og komust færri að en vildu, samkvæmt upplýsingum Bridgesambandsins.

Keppnin hófst í gær á Stjörnutvímenningi en í dag er spilaður tvímenningur með 130 pörum. Spilaðar verða níu umferðir og lýkur tvímenningnum á föstudagskvöld. Á laugardag hefst síðan sveitakeppnin sem lýkur síðdegis á sunnudag með verðlaunaafhendingu. Mótið er opið almenningi og er frítt inn. Nánari upplýsingar um mótið má sjá á bridge.is.