Eltir konur vestur um haf

"Okkur hefur lengi langað til Los Angeles því þar er fullt af Íslendingum að gera það gott á fjölmörgum sviðum," segir sjónvarpsmaðurinn Jón Ársæll Þórðarson sem er nýkominn heim frá Bandaríkjunum þar sem hann sótti heim Íslendinga sem hafa komið sér vel fyrir vestanhafs.

Tilviljun ein réði því að viðmælendur Jóns Ársæls voru einungis kvenkyns að þessu sinni. "Við Steini [Steingrímur Þórðarson framleiðandi] erum breyttir menn eftir túrinn og mun mýkri en áður.

Stundum hefur hallað á kvenfólk í þáttunum um Sjálfstætt fólk en við reynum að gæta þess að hafa jafnréttið í huga eins og við eigum öll að gera," segir Jón Ársæll sem byrjaði á því að fara á tískuvikuna í New York þar sem hönnuðir heimsins afhjúpuðu sumartísku næsta árs. "Við fórum á hverja tískusýninguna á fætur annarri í fylgd Áslaugar Magnúsdóttur, sem er að verða mikill áhrifavaldur í tískunni þar vestra og þá um leið um heim allan."

Í Los Angeles flakkaði Jón Ársæll svo á milli leik- og tónlistarkvenna í borg englanna. "Við byrjuðum á að hitta leikkonuna Anítu Briem sem er að gera það gott. Á meðan við vorum með henni var hún í stöðugum prufum og á samningafundum fyrir nýjar kvikmyndir. Hún er stolt okkar, sverð og skjöldur og ástfangin upp fyrir haus."

Jón Ársæll heimsótti einnig Önnu Mjöll Ólafsdóttur sem stendur í miðjum erfiðum skilnaði. Anna Mjöll er, að sögn Jóns, eftirsótt söngkona í Bandaríkjunum og hefur fundið ástina á nýjan leik. Jón segir Önnu Mjöll opna sig í þættinum og fullyrðir að hann eigi ekki eftir að láta neinn ósnortinn.

Þá heimsótti sjónvarpsmaðurinn hljómsveitina Steed Lord með Svölu Björgvinsdóttur í fararbroddi í Los Angeles, en tónlist sveitarinnar vekur stöðugt meiri athygli. "Svo fylgdumst við með Ölmu, Klöru og Steinunni í The Charlies og fengum meðal annars að sjá þær syngja á tónleikum fyrir valinn hóp fjárfesta, blaða- og umboðsmanna. Þegar ég lít yfir þessa hröðu en skemmtilegu daga fyllist ég einfaldlega stolti yfir öllu sem íslenskt er."

alfrun@frettabladid.is