Tekist á um breytingar meirihlutans á tillögu Þórs Saari

Hart var tekist á um það á Alþingi í dag hvort breytingartillaga meirihluta stjórnskipunar- og eftirlitsnefndar, á þingsályktunartillögu Þórs Saari um meðferð frumvarps stjórnlagaráðs til stjórnskipunarlaga, sé svo mikil að um nýja tillögu sé í raun að ræða. Þingmenn Sjálfstæðisflokks og Framsóknarflokks tóku málið upp áður en tillagan var tekin til annarar umræðu í dag. Meðal annars var gagnrýnt að ekki sé fyrir hendi kostnaðargreining í málinu.

Þór Saari, sem lagði málið fram upphaflega, er þó ekki á sömu skoðun og segir að um sama mál sé í grundvallaratriðum að ræða. Forseti Alþingis gerir heldur ekki athugasemdir við breytingartillöguna. Hún sagði gerbreytingar á tillögum vissulega óheimilar, en að ekki væri fyrir því að fara í þessu tilfelli.

Að þessum delum afstöðnum hélt Valgerður Bjarnadóttir framsögu fyrir hönd meirihlutans í nefndinni, en gert er ráð fyrir að þjóðinni gefist kostur á að kjósa um breytingarnar á Stjórnarskrá Íslands samfara næstu forsetakosningum.

Fulltrúar Sjálfstæðisflokks í nefndinni skiluðu séráliti og eru þeir andvígir niðurstöðu meirihlutans. Lögð er áhersla á að í henni séu „ráðagerðir um enn frekari tilraunastarfsemi í sambandi við stjórnarskrárbreytingar og telja að þær aðferðir sem meiri hlutinn leggur til leiði til ómarkvissra og ruglingslegra vinnubragða í sambandi við framhald málsins.“

Vigdís Hauksdóttir þingkona framsóknarflokksins og nefndarmaður í stjórnskipunar- og eftirlitsnefnd lagði einnig fram sérálit þar sem hún segist mótfallin málinu og leggur til að það verði fellt.