Steinunn Ólína ætlar ekki í forsetaframboð

Steinunn Ólína Þorsteinsdóttir leikkona ætlar ekki að bjóða sig fram til embættis forseta Íslands en hún segist hafa velt því fyrir sér af alvöru og einlægni síðustu mánuði. Steinunn Ólína gaf það einnig í skyn í fjölmiðlum að hún myndi bjóða sig fram til embættisins. Á Facebook-síðu sinni segist hún líta svo á að hún hafi ekki tækifæri til að gegna embættinu að svo stöddu en hún telji nauðsynlegt að kraftmikil og réttsýn manneskja taki við lyklunum að Bessastöðum og virki forsetaembættið til góðra verka.

Hægt er að sjá færslu Steinunnar Ólínu hér fyrir neðan, eða á Facebook-síðu hennar hér.

Kæru vinir.

Eins og margir vita hef ég verið að velta fyrir mér framboði til embættis forseta Íslands. Ég velti þeim möguleika fyrir mér af alvöru og einlægni um margra mánaða skeið. Hugmyndin var sjálfsprottin og varð til án alls utanaðkomandi þrýstings. Ég tel nauðsynlegt að kraftmikil og réttsýn manneskja taki við lyklunum að Bessastöðum og virki forsetaembættið til góðra verka.

Þrátt fyrir að mér finnist ennþá framúrskarandi hugmynd að ég verði forseti lýðveldisins lít ég svo á að ég hafi ekki tækifæri til að hrinda henni í framkvæmd að svo stöddu. Því hef ég ákveðið að bjóða mig ekki fram að þessu sinni.

Ég vil þakka öllum þeim sem hvöttu mig til dáða, gáfu mér góð ráð og voru mér innan handar á síðustu mánuðum. Ísland býr yfir ótal tækifærum og jákvæðum krafti til uppbyggingar í samfélaginu. Ég mun nú einbeita mér að öðrum verðugum og spennandi verkefnum.

Með bestu kveðjum

Steinunn Ólína