Fékk nóg af dyraati - dæmdur fyrir að svipta dreng frelsinu

Karlmaður var dæmdur fyrir frelsissviptingu í Héraðsdómi Reykjavíkur í dag. Maðurinn elti uppi níu ára gamlan dreng sem hafði ítrekað gert dyraat heima hjá honum, og neyddi hann heim til sín í janúar árið 2010.

Drengurinn hafði ásamt félaga sínum margsinnis, um þriggja mánaða skeið, gert dyraat hjá manninum og fjölskyldu hans. Drengirnir hringdu bjöllunni eða lömdu á hurðina þrisvar í viku á milli sex og níu á kvöldin, stundum þegar verið var að svæfa ungbarn á heimilinu. Þá var einnig hundur á heimilinu sem byrjaði ávallt að gelta við lætin.

Loksins sá maðurinn drengina og elti þá uppi. Maðurinn var einnig ákærður fyrir líkamsárás þegar hann keyrði drenginn niður. Litlir áverka voru á drengnum og var maðurinn sýknaður af líkamsárás. Aftur á móti segir í dóminum að rétt hefði verið að færa drenginn beint heim til hans en ekki inn á heimili hins ákæra, líkt og hann gerði. Drengurinn var þó aðeins staddur í íbúðinni í skamma stund.

Þótti dóminum því réttast að dæma manninn fyrir frelsissviptingu. Refsingu mannsins er þó frestað haldi hann almennt skilorð í tvö ár. Þá er honum gert að greiða drengnum hundrað þúsund krónur í miskabætur. Áður hafði fjölskylda drengsins farið fram á milljón krónur í miskabætur.