Eitt tonn af kennslubókum frá Kína

Rúmlega eitt tonn af kennslubókum í kínversku á íslenskri tungu bárust hingað til lands á dögunum. Þær eru gjöf frá Kínverjum en bækurnar eru ætlaðar fyrir allt niður í fimm ára börn.

Konfúsíusarstofnunin Norðurljós við Hákskóla Íslands fékk bækurnar að gjöf frá Hanban, sem er undirstofnun kínverska menntamálaráðuneytisins. Um er að ræða þúsundir kennslubóka, margmiðlunardiska, myndbækur fyrir börn og orðabækur. Tilgangurinn með gjöfinni er opna heim kínverskrar tungu og menningar fyrir Íslendingum en samskipti á milli þjóðanna hafa aukist töluvert síðustu misseri.

„Ég var nú eiginlega bara hissa þegar ég sá hversu gæðin eru mikil á þessu, þetta er virkilega vel unnið og skemmtilegar bækur sem ég held að eigi eftir að reynast mjög vel," segir Geir Sigurðsson, forstöðumaður stofnunarinnar.

Hingað til hefur námsefni í kínversku hér á landi allt verið á ensku. Geir segir mikilvægt að fá bækur sem hægt er að nota til að kenna kínversku á móðurmáli okkar íslensk, sérstaklega þegar kemur að börnum.

„Núna held ég að við höfum svona tækifæri til að vinna betur að því að kenna kannski kínversku á yngri stigum í skólakerfi landsins," segir Geir.

Geir segir kínversku skipta sífellt meira máli.

„Þá erum við einfaldlega að horfa á stórveldi sem að mun vera mjög áberandi á næstu öld, að minnsta kosti, þannig að það er mjög eðlilegt að kínverska sem tungumál, sem einverskonar alþjóðamál eigi eftir að aukast í umfangi og mikilvægi," segir Geir.