Ánægð með lífið í New York

"Ég hef verið að vinna við hitt og þetta; tónlist, tónleikahald, almannatengsl og á öðrum sviðum skemmtanaiðnaðarins," segir Rósa Guðmundsdóttir tónlistar- og athafnakona. Hún hefur verið búsett í New York síðustu átta ár og tekið sér ýmislegt fyrir hendur á þeim tíma.

"Ég hef verið með annan fótinn í New York síðustu fjórtán ár, upprunalega vegna almannatengsla skrifstofunnar The Icelandic Connection sem ég stofnaði með amerískum fjárfesti um aldamótin. Síðan þá hef ég aðallega unnið við tónlist og skemmtanabransann," segir Rósa sem vakti fyrst athygli sem þáttastjórnandi á Skjá einum. Hún kveðst ánægð með lífið í stórborginni og hyggst dvelja þar áfram um óákveðinn tíma. "Ég ætla að vera hér eins lengi og mér finnst viðeigandi. Frá því ég var barn vissi ég að ég ætlaði að vinna í skemmtanaiðnaðinum í New York. Ég kalla borgina heimili mitt og hef myndað náin tengsl hér."

Í sumar lék Rósa í tónlistarmyndbandi fyrir vin sinn í hljómsveitinni Ballistik Beatz og má sjá myndbandið á vefsíðunni Youtube. Hún segist hafa skemmt sér vel við tökurnar og verið alveg ófeimin. "Þeir lofuðu mér indælum degi í sólinni og að myndbandið yrði á léttu nótunum þannig að ég sló til. Systir mín var í heimsókn á þessum tíma og kom með mér og þótti mjög gaman. Mér þótti lítið mál að hoppa og skoppa um á bikiníi enda mundi ég seint teljast þröngsýn."

Spurð út í framtíðaráform sín segir Rósa þau óákveðin. "Ég ætla bara að leyfa því að koma í ljós. Mér finnst lífið skemmtilegt í dag." - sm