Biður fólk um að sýna þolinmæði vegna dóms Hæstaréttar

Efnahags- og viðskiptaráðherra segir svigrúm bankanna til afskrifta ekki vera meira þrátt fyrir að þeir geti tekið á sig tug milljarða tjón vegna gengistryggðra lána. Það sé algjörlega óskylt almennri niðurfærslu lána. Forsætisráðherra segir fólk þurfa að sýna þolinmæði.

Hagfræðistofnun Háskóla Íslands kynnti í lok janúar skýrslu um að svigrúm til að afskrifa húsnæðislán almennings væri ekki lengur fyrir hendi. Nú eftir dóm Hæstaréttar um gengistryggð lán er hins vegar fullyrt að bankarnir standi nægilega sterkir til að taka á sig jafnvel tug milljarða tjón vegna endurútreikninga, þetta kann að rugla marga.

„Það er eðlilegt að svona sé spurt en þá er mjög mikilvægt að hafa á hreinu um hvað var verið að tala. Hagfræðistofnun var að reyna að meta hvaða svigrúm bankanna í skilningi þess afsláttar sem þeir fengu á flutningi lánasafnisins úr gömlu bönkunum í nýju í tilviki heimila væri uppurið og niðurstaðan var sú," sagði Steingrímur J. Sigfússon.

Þar með hafi niðurfærslur lána til einstaklinga, sem eru hátt í 200 milljarðar króna, byggt á afslætti milli gömlu og nýju bankanna verið fullnýttar.

„Það sem við erum að tala um núna er hins vegar það að efnahagslegur styrkur bankanna gera það að verkum að þeir geta tekið þetta á sig og þeir eiga að gera það að því marki sem að fólk á rétt á þessum endurreikningi en þá er það allt annar hlutur."

Ráðherrar ræddu dóm hæstaréttar á löngum ríkisstjórnarfundi í morgun, enn er óljóst hvert fordæmisgildi dómsins mun vera en forsætisráðherra segir málið vera hjá fjármálastofnunum.

„Þetta er erfitt úrlausnarefni og hugsanlega verður það ekki leyst nema fyrir dómstólum aftur en auðvitað reynum við að leysa úr þessu eins og hægt er þannig að fólk þurfi ekki að bíða lengi um niðurstöðu en fólk verður samt að hafa þolinmæði að þeir þurfi að við vinnum þetta á vandaðan hátt sem er alveg nauðsynlegt," sagði Jóhanna Sigurðardóttir, forsætisráðherra.