Styttist í Superman - Ný stikla frumsýnd

Bandaríska kvikmyndaverið Warner Bros. hefur opinberað stiklu fyrir nýjustu kvikmyndina um Ofurmennið. Myndin ber heitið Man of Steel en það leikarinn Henry Cavill sem fer með aðalhlutverkið.

Gríðarleg eftirvænting er fyrir kvikmyndinni enda eru nokkrir af þekktustu kvikmyndagerðarmönnum samtímans sem koma að gerð hennar. Leikstjórn er í höndum Zack Snyder en hann hefur heillað bæði áhorfendur sem og gagnrýnendur fyrir kvikmyndir á borð við Dawn of the Dead, Watchmen og 300.

Aðalframleiðandi Man of Steel er Christopher nokkur Nolan en hann á einmitt heiðurinn á þríleiknum um Leðurblökumanninn sem nýlega náði hápunkti sínum með kvikmyndinni The Dark Knight Rises.

Leikendur í Man of Steel eru margir heimsfrægir. Þar á meðal eru Kevin Costner og Diane Lane , sem fer með hlutverk hjónanna Jonathan og Martha Kent sem tóku hinn unga Superman að sér.

Amy Adam leikur Lois Lane, fréttakonuna knáu á Daily Planet og ástarviðfang Clarks Kent. Laurence Fishburne leikur yfirmann hennar, Perry White.

Það er síðan enginn annar er Russell Crowe sem fer með hlutverk Jor-El sem er líffræðilegur faðir Clarks.

Hægt er að sjá stikluna hér fyrir ofan en Man of Steel verður frumsýnd 13. júní næstkomandi í Bandaríkjunum.