Mahalia Jackson fastur hluti aðventunnar

Esther Jökulsdóttir og hljómsveit flytja jóla- og gospellög í Egilsstaðakirkju og Fríkirkjunni í Reykjavík.

Söngkonan Esther Jökulsdóttir syngur jólalögin af sígildri plötu Mahaliu Jackson á tónleikum í Egilsstaðakirkju í kvöld. Þetta er sjötta árið í röð sem Esther flytur jóla- og gospellög að hætti Mahaliu, en í fyrsta sinn sem hún fer með prógrammið austur.

"Ég er alin upp á Héraði og þykir mjög gaman að fara loksins heim með þetta prógramm sem er mér mjög hjartfólgið," segir Esther. Ástæða þess hve mikið Esther heldur upp á lög Jackson er sú að á hennar æskuheimili var platan með Mahaliu Jackson, Silent Night, sett á fóninn á aðfangadagskvöld þegar jólin gengu í garð. "Þegar tónar plötunnar bárust um húsið þá voru jólin byrjuð," segir Esther og bætir við að það hafi blundað í henni í mörg ár að syngja lögin áður en hún lét slag standa.

"Ég fékk svo úrvalsfólk í lið með mér og þetta hafa alltaf verið dásamlegir tónleikar, það má segja að þeir séu orðnir að hefð hjá mér," segir Esther sem flytur prógrammið í Fríkirkjunni í Reykjavík þann 13. desember klukkan átta. Auk hennar koma fram Bjarni Arason sem er gestasöngvari, karlakvartett skipaður þeim Benedikt Ingólfssyni bassa, Einari Clausen og Skarphéðni Hjartarsyni og Erni Arnarsyni tenórum, og hljómlistarmennirnir Aðalheiður Þorsteinsdóttir, sem leikur á píanó, á trommum er Erik Qvick, Gunnar Gunnarsson leikur á Hammondorgel og Gunnar Hrafnsson á kontrabassa. Útsetningar laganna eru unnar af Aðalheiði og Skarphéðni.