Erfitt að þyngjast

Leikkonan þaulreynda Sally Field þurfti að leggja ýmislegt á sig til að landa hlutverki í nýjustu kvikmynd Stevens Spielbergs, Lincoln.

Í myndinni leikur Sally Mary Todd Lincoln, eiginkonu Abrahams Lincolns, og þurfti hún að þyngjast um rúm ellefu kíló til að fá hlutverkið. Sally er orðin 66 ára og segir þetta ferli hafa verið þyrnum stráð.

"Þetta var mjög erfitt. Þetta var ekki eins gaman og maður myndi halda. Ég hugsaði oft að ég myndi örugglega deyja ef ég gerði þetta ekki rétt og þá fengi einhver annar hlutverkið. Ég reyndi að þyngjast á heilsusamlegan hátt en mér skilst að það sé ekki hægt. Ég borðaði brún hrísgrjón og drakk próteindrykki. Það var viðbjóður. Þetta snerist um aga," segir Sally. Það var heldur ekki tekið út með sældinni að losa sig við kílóin aftur.

"Það tók mig hálft ár að bæta á mig og ár að léttast. Ég æfði eins og brjálæðingur og var með tvo þjálfara."