Hættið að borða svona mikið!

Joanna Lumley, sem Íslendingar þekkja best úr sjónvarpsþættinum Absolutely Fabulous, er óhrædd við að tjá skoðanir sínar. Hún veit nákvæmlega af hverju fólk er of feitt nú til dags.

"Mikið af fólki er of gráðugt. Fólki finnst það þurfa að fá sér bollaköku. Hvað meinarðu að þú þurfir þess? Þú verður feitur, bjálfinn þinn. Fólk er of feitt því það borðar allt sem er fyrir framan það. Fólk þarf ekki megrunarbækur. Það ætti bara að hætta að borða svona mikið," segir Joanna sem vann eitt sinn sem fyrirsæta.

Joanna er grænmetisæta og segir það ástæðuna fyrir því að hún hafi haldið sér í formi í öll þessi ár.

"Ég úða ekki í mig. Á dæmigerðum degi borða ég salat, aðeins meira salat og örlítið meira salat. Ég æfi ekki neitt. Ég fer ekki í líkamsræktarstöðvar. Fólk borgar peninga fyrir að ganga á staðnum. Mér býður við því. Farið og týnið rusl í staðinn. Málið hús hjá gamalli konu. Ég hræðist líkamsræktarstöðvar."