Ég hefði gert hvað sem er fyrir hann

Þó að Tom Cruise og Nicole Kidman hafi skilið fyrir rúmlega áratug er hjónaband þeirra enn þá eitt það umtalaðasta í Hollywood. Nicole tjáir sig um tímann með Tom í nýjasta hefti tímaritsins DuJour.

"Ég var skotin upp fyrir haus – ég varð mjög ástfangin af honum. Ég hefði gert hvað sem er fyrir hann," segir Nicole en þau hittust á setti myndarinnar Days of Thunder árið 1989. Þau gengu í það heilaga ári seinna og skildu árið 2001.

Þegar Nicole horfir til baka sér hún að hún og Tom voru mjög barnaleg í þá daga.

"Við vorum í okkar eigin heima, bara við tvö. Við urðum mjög háð hvort öðru."

Eftir skilnaðinn var Nicole ein nokkuð lengi.

"Ég gerði mér grein fyrir því að mig langaði ekki að vera ein. Mig langaði að verða ástfangin aftur en ég var ekki viss um hvort ég gæti það," segir Nicole. Hún hitti kántrístjörnuna Keith Urban árið 2006 og varð svo sannarlega ástfangin á ný.