Þjóðinni boðið í bíó

Evrópsk kvikmyndahátíð hefst í Bíó Paradís annað kvöld. Hátíðinni er ætlað að gefa áhorfendum þverskurð af því besta sem Evrópa hefur upp á að bjóða í kvikmyndagerð.

Í tilefni hátíðarinnar er almenningi boðið í bíó annað kvöld. Hægt verður að velja um fjórar myndir; Alpana eftir Giorgos Lanthimos, Strák á hjóli eftir Dardenne-bræður, Hafið djúpa bláa eftir Terence Davies og Gaurana eftir Olivier Dahan. Húsið opnar klukkan 19 og hefjast sýningar klukkustund síðar. Einnig verður boðið upp á veitingar og gildir boðið á meðan húsrúm leyfir.

Hátíðin skiptist í fjóra hluta og á henni verða meðal annars sýndar myndir sem tilnefndar eru til Lux-verðlauna Evrópuþingsins, nýjar evrópskar myndir og myndir sem fjalla um kynbundið ofbeldi. Hátíðin stendur til 25. nóvember og er almennt miðaverð 500 krónur. Einnig er hægt að kaupa passa fyrir 2.000 krónur.