Ekki er allt sem sýnist hjá Britney Spears

Poppstjarnan Britney Spears hefur slegið í gegn sem dómari í bandaríska sjónvarpsþættinum X Factor sem sýndur er á Stöð 2. Hún situr í rándýru dómarasæti ásamt Demi Lovato, L.A. Reid og Simon Cowell.

En ekki er allt sem sýnist því Britney fær hvorki að nota internetið né gemsann sinn án eftirlits. Fjögur ár eru síðan söngkonan fékk taugaáfall, hún missti forræðið yfir sonum sínum tveimur og myndin af henni, bjargarlausri í sjúkrabíl, var allt að því óhugnanleg.

Hún var umtalaðasta konan sem átti allt og hafði tapað áttum.

Henni vegnar vel í X Factor og allt lítur ljómandi vel út á yfirborðinu en aðgangur hennar að fjölmiðlum og við heiminn yfirhöfuð hefur verið takmarkaður að mestu. Pabbi hennar og unnusti fylgjast með hverju fótspori sem hún tekur og öllum símtölum. Allt er gert til að halda neikvæðum fréttum og umsögnum um hana sjálfa algjörlega frá henni. Þá má fyrrverandi umboðsmaður hennar alls ekki komast í samband við söngkonuna.

Britney var á sínum tíma svipt sjálfræði og hefur ekki fengið það aftur. Hún má til að mynda ekki fara á salerni án fylgdar unnustans.

Lukkuleikur Lífsins.