Úrskurðaður í tveggja vikna gæsluvarðhald - sætir geðrannsókn

Karlmaðurinn, sem er grunaður um að hafa orðið konu að bana á heimili sínu aðfaranótt mánudags, var í dag í héraðsdómi Reykjaness úrskurðaður í gæsluvarðhald til 21. febrúar að kröfu lögreglunnar á höfuðborgarsvæðinu og er það gert á grundvelli rannsóknarhagsmuna.

Maðurinn er grunaður um manndráp en kona á fertugsaldri fannst látin á heimili mannsins í Hafnarfirði í gærmorgun.

Á konunni voru áverkar eftir eggvopn og er maðurinn grunaður um að hafa valdið þeim. Það er í samræmi við framburð mannsins þegar hann kom á lögreglustöð og greindi frá málinu. Aðrir liggja ekki undir grun. Lífsýni verða send til frekari rannsóknar. Maðurinn mun undirgangast geðrannsókn.

Eins og fram hefur komið gaf maðurinn sig fram á lögreglustöð í gær og greindi frá atviki sem hafði átt sér stað á heimili hans.

Framburður hans var um margt óljós samkvæmt tilkynningu frá lögreglunni, en strax var haldið heim til mannsins og þar fannst kona á fertugsaldri.

Hún var látin þegar að var komið en á henni voru sjáanlegir áverkar. Konan var gestkomandi á heimili mannsins, sem er 23 ára gamall, en þau höfðu þekkst um hríð.

Lagt var hald á eggvopn í þágu rannsóknarinnar. Maðurinn, sem var í annarlegu ástandi, hefur áður komið við sögu hjá lögreglu.