Meðalaldur þeirra sem taka smálán eru tæp þrjátíu og tvö ár, og meðallánsfjárhæðin rúmar sautján þúsund krónur. Þetta kemur fram í gögnum sem samtök smálánafyrirtækja hafa tekið saman.



Smálánafyrirtækið 1909 er í eigu smálánafyrirtækisins Hraðpeninga, og fyrirtækið Smálán er í eigu Kredia. Þessi fjögur fyrirtæki eru síðan í samtökum smálánafyrirtækja sem nefnist Útlán. Fimmta smálánafyrirtækið á íslenskum markaði, Mula, er utan félagsins.



Þessi starfsemi er sögð vera siðlaus. Hvað hefurðu að segja um það? „Ég held að þetta sé algjör stormur í vatnsglasi. Þessi umræða um smálánafyrirtæki hefur verið mjög einhliða," segir Haukur Örn Birgisson, lögmaður Útlána - samtaka smálánafyrirtækja.



Samkvæmt gögnum sem Útlán hefur tekið saman er meðalánsfjárhæð smálána 17.300 krónur. Hæsta fyrsta lán sem veitt er til viðskiptavina undir 20 ára er 10 þúsund krónur. Meðalaldur viðskiptavina fyrirtækjanna er rúm 31 ár. Hlutfall viðskiptavina undir tuttugu ára aldri er tæp fjögur prósent, og hlutfall þeirra lána sem tekin eru að kvöldi til og að nóttu, eru níu prósent.



Á haustþingi verður lagt fram frumvarp þar sem lagaumgjörð um smálánafyrirtæki verður hert.



„Með því verða svokölluð smálán færð undir neytendalánalöggjöfina og það er bara vel," segir Haukur. „Þetta er eitthvað sem forsvarsmenn þessara fyrirtækja hafa í raun óskað eftir síðan árið 2009. Beðið um það að lög yrðu sett einmitt til þess að koma í veg fyrir þessa umræðu sem hefur verið og þessar gróusögur sem hafa verið á kreiki um starfsemina."



Útlán tók einnig saman þau skilyrði sem þarf að uppfylla til að fá smálán.



Þú mátt ekki vera á vanskilaskrá, ekki skráður hjá umboðsmanni skuldara, með skráð símanúmer og gilt debetkort, og til að hækka lánsheimild þarf að standa í skilum á fyrri lánum, og fara aftur í greiðslumat.