Fagnaði bronsinu en fékk það ekki - Lysenko vann sleggjukast kvenna

Tatyana Lysenko frá Rússlandi varð í kvöld Ólympíumeistari í sleggjukasti kvenna á nýju Ólympíumeti, 78,18 metrar, en Anita Wlodarczyk frá Póllandi fékk silfur og Betty Heidler frá Þýskalandi tók bronsið.

Zhang Wenxiu frá Kína hélt að hún hefði unnið bronsið í sleggjukastinu eftir að starfsmenn klúðruðu mælingunni á besta kasti Betty Heidler. Heidler mótmælti að sjálfsögðu enda var kast hennar fullkomlega löglegt.

Zhang Wenxiu hljóp hring með kínverska fánann til að fagna bronsinu sínu en á meðan tókst starfsmönnum að endurmæla kast Heidler og það dugði síðan til færa þeirri þýsku bronsið.

Wenxiu fór því tómhent heim en Heidler fagnaði.

Tatyana Lysenko tvíbætti Ólympíumetið og átti alls fjögur köst yfir 77 metra. Hún varð einnig heimsmeistari í sleggjukasti fyrir einu ári í Daegu í Suður-Kóreu.