Jamaíka náði ekki að ljúka keppni | Bolt á ekki möguleika á fjórða gullinu

Karlasveit Jamaíku náði ekki að ljúka keppni í undanrásum í 4x400 metra boðhlaupinu á Ólympíuleikunum í London í morgun. Jermaine Gonzales, sem hljóp þriðja sprettinn fyrir Jamaíku, meiddist og varð að hætta keppni. Þar með er ljóst að Usain Bolt mun ekki hafa möguleika á að landa fjórum gullverðlaunum á ÓL, en hann hafði gefið það í skyn að hann gæti tekið einn sprett fyrir Jamaíku í úrslitahlaupinu.

Sveit Bahama sigraði í þessum riðli en Ólympíumeistarasveitin frá Bandaríkjunum varð í öðru sæti. Bandaríkin hafa haft mikla yfirburði í þessari grein og fagnað sigri á síðustu sjö sumarleikum. Trínidad og Tóbagó og Bretland komust einnig í úrslit.

Oscar Pistorius og félagar hans í suður-afrísku sveitinni náðu ekki að ljúka keppni en Ofentse Mogawane liðsfélagi Oscar féll eftir að að hafa rekist á Vincent Mumo Kiilu frá Kenýa. Pistorius er eins og kunnugt er með gervifætur og eru þeir íslensk framleiðsla – frá fyrirtækinu Össur.