Fólskuleg líkamsárás í Þorlákshöfn

Ráðist var á mann þar sem hann var að kasta af sér þvagi á bak við skemmtistaðinn Happy hour í Þorlákshöfn rétt fyrir klukkan tvö aðfaranótt laugardags. Samkvæmt upplýsingum frá lögreglu var árásarmaðurinn einn á ferð og réðist aftan að fórnarlambinu og tókst að koma honum niður og lét hnefahögg dynja á andliti mannsins sem leiddi til nefbrots.

Sá sem varð fyrir árásinni þekkti ekki árásarmanninn né vissi hvað honum gekk til. Honum er lýst sem 180 sentrimetra háum, grannvöxnum og burstaklipptum í röndóttri skyrtu. Lögreglumenn leituðu að manninum um tíma en án árangurs.

Lögreglan á Selfossi biður alla þá sem geta veitt upplýsingar um málið að hafa samband í síma 480-1010.