Íslenskur hagfræðingur tekur þátt í Ólympíuleikunum

„Ég veit ekki alveg hvað ég er að fara að gera, það er enn mikil leynd í kringum þetta," segir einn óvæntasti þátttakandi Íslendinga í Ólympíuleikunum, en hagfræðingurinn Þóra Helgadóttir mun þó ekki keppa fyrir hönd Íslands, hún mun dansa í lokaathöfninni á Ólympíuleiknum í ágúst næstkomandi.

Þóra fór í prufur í Lundúnum á dögunum ásamt hundruðum, ef ekki þúsundum annarra, og leist dómnefndinni svo vel á hana að hún var valin til þess að vera dansari í lokasýningunni, sem er einhver glæsilegasta athöfn sem finna má á íþróttaviðburðum.

„Upphaflega prófaði ég allskonar hluti fyrir sýninguna, en svo var ég boðuð í dansprufurnar," lýsir Þóra en hún hefur lengi stundað dans, meðal annars kennt hann hér á landi. Þóra hefur verið búsett í Bretlandi síðan árið 2007 en hún vinnur sem hagfræðingur hjá breska fjármálaráðuneytinu, þar sem hún sér um hagspár fyrir ráðuneytið.

Hún segir gríðarlega leynd hvíla á atriðinu en hún hafi fengið æfingaáætlun í hendur á dögunum. Þannig þarf Þóra að mæta á 8 æfingar sem hefjast í júní næstkomandi. Þóra segir að hún hafi bara viljað taka þátt í Ólympíuleikunum með einhverjum hætti, því hafi hún ákveðið að prófa að fara í prufur.

„Ég er nú samt með smá fyrirvara á þessu. Maður veit ekki hvað gerist og það er langt í athöfnina," segir Þóra.

Alls hafa fimm Íslendingar tryggt sér þátttökurétt á Ólympíuleikunum í sumar, auk hanboltalandsliðsins. Það eru þau Ásdís Hjálmsdóttir spjótkastari, Ragna Ingólfsdóttir badmintonkona, Kári Steinn Karlsson maraþonhlaupari, Eygló Ósk Gústafsdóttir, sundkona úr Sundfélaginu Ægi, og kúluvarparinn Óðinn Björn Þorsteinsson úr FH.