Fá tilkynningar um týnda unglinga annan hvern dag

Lögreglan á höfuðborgarsvæðinu hefur að meðaltali fengið tilkynningu um týnda unglinga annan hvern dag á síðastliðnum fjórum árum. Forstöðumaður fjölskyldumiðstöðvar ráðleggur foreldrum að eyða tíma með börnum sínum.

Samkvæmt upplýsingum frá lögreglunni á höfuðborgarsvæðinu um leit eða eftirgrennslan af börnum á aldrinum ellefu til átján ára kemur fram að lögreglan hefur á síðastliðnum fjórum árum fengið að meðaltali tvöhundruð tilkynningar á ári. Lögreglunni berast ekki upplýsingar um öll tilvik þar sem leit er gerð að barni enda leita foreldrar oft annara úrræða áður en tilkynnt er inn til lögreglunnar. Árið 2008 var fjöldi tilvika þar sem lögreglan hóf leit eða eftirgrennslan að barni 179 talsins. Sú tala hækkaði töluvert árið 2009 en þá voru tilkynningar alls 220 og árið 2010 einni færri eða 219.

Á síðasta ári fækkaði tilkynningum nokkuð en þá voru þær 182 talsins. Meðalfjöldi tilvika fór því úr tæpum fimmtán á mánuði árið 2008 í átján á mánuði árin 2009 og 10 og svo aftur í fimmtán á síðasta ári. Lögreglan fær því að meðaltali tilkynningu annan hvern dag um týnda unglinga.

Ragnheiður Sigurjónsdóttir, forstöðumaður Fjölskyldumiðstöðvar, sem styður foreldra sem eiga börn í vanda, s.s. vegna vímuefnaneyslu, samskiptaerfiðleika og hegðunar segir mikilvægt að foreldrar og unglingar sem eiga í vanda leiti sér aðstoðar. Þá sé mikilvægt að foreldrar og börn verji nægum tíma saman.