Nýtt húsnæði á Kleppi tekið í gagnið

Sjúklingar réttargeðdeildarinnar fluttust í dag í nýtt húsnæði á Kleppi í Reykjavík. Á deildinni eru þeir vistaðir sem dæmdir eru ósakhæfir og úrskurðaðir í öryggisgæslu.

Nýja réttargeðdeildin er átta hundruð fermetrar að stærð og fer öll starfsemin fram á einni hæð. Sérstakt fjölskyldusvæði er í nýja húsnæðinu þar sem að aðstandendur sjúklinga geta komið og eytt tíma með þeim en það svæði er aðskilið frá deildinni sjálfri. Þegar komið er inn á deildina tekur við setustofa þar sem sjúklingar geta sest niður saman og rætt málin, skellt sér á hlaupabretti eða fengið útrás á þrekhjóli.

Aðstaða er til náms og lestrar á deildinni auk þess sem sjúklingum mun verða skammtaður tími í nettengdri tölvu og munu starfsmenn deildarinnar geta fylgst með þeirri notkun.