Eftirlitsmenn komnir til Írans

Eftirlitsmenn Alþjóðakjarnorkumálastofnunar komu til Íran í dag. Er þetta í annað skiptið í mánuðinum sem eftirlitsmenn heimsækja Íran en þeir munu halda áfram rannsókn sinni á kjarnorkuáætlun landsins.

Forsvarsmaður eftirlitsmannanna sagði að rannsóknin væri gerð til að skera úr um hvort að hernaðarlegar forsendur væru fyrir auðgun úrans í Íran.

Yfirvöld í Íran þvertaka fyrir að þróun kjarnavopna sé tilgangur áætlunarinnar og halda því fram að auðgun úrans sé gerð í læknisfræðilegum tilgangi.

Tortryggni í garð kjarnorkuáætlunar Írans hefur valdið mikilli spennu á svæðinu og er talið að stjórnvöld í Ísrael íhugi nú að granda kjarnorkurannsóknarstöðvum landsins með loftskeytaárás.