Íslenskur piltur lést í umferðarslysi í Tansaníu

Íslenskur maður lést í alvarlegu umferðarslysi á laugardaginn í Tansaníu í Afríku. Utanríkisráðuneytið staðfesti í samtali við Vísi að maðurinn hefði látist en vildi ekki gefa upp nánari upplýsingar um málið.

Maðurinn var rétt tæplega tvítugur og var á ferð með sænskum félögum sínum þegar hann lenti í slysinu.

Umferðaróhappið átti sér stað í Arusha í Tansaníu, sem er nærri hæsta fjalli Afríku, Kilimanjaro.

Samkvæmt heimildum Vísis var pilturinn búsettur í Svíþjóð þegar hann lést.

Samkvæmt upplýsingum frá utanríkisráðuneytinu er það í samstarfi við sænska sendiráðið vegna málsins þar sem Ísland er ekki með sendiráð þar í Tansaníu, né ræðismann sem er staddur í landinu.

Orsök slyssins eru óljós. Fram kemur í sænskum fréttum að tvær jeppabifreiðar hafi skollið saman á þjóðveginum nærri Kilimanjaro.