Lögregla stöðvaði bjórkvöld sem fór úr böndunum

Bjórkvöld í framhaldsskólum hafa löngum verið vinsæl en um síðustu helgi stöðvaði lögreglan eina slíka samkomu í Reykjavík. Þegar lögreglan kom á staðinn voru þar inni 2 - 300 ungmenni og mörg hver undir áhrifum áfengis. Framhaldsskólanemar eru fæstir orðnir tvítugir og því er ólöglegt að veita þeim áfengi.

Í þessu tilfelli voru börn niður í sextán ára aldur á staðnum og var sala áfengis umsvifalaust stöðvuð og staðnum lokað. Lögreglan minnir á að slík kvöld, sem haldin eru á skemmtistöðum, eru ekki skólaböll og því þarf ekki að sækja um leyfi fyrir þeim. Þau eru því alfarið á ábyrgð leyfishafa hlutaðeigandi staðar.

„Undanfarið hefur lögreglan fylgst með dvöl ungmenna á veitinga- og skemmtistöðum og svo verður áfram. Reynslan sýnir að full þörf er á slíku eftirliti en lögreglan hvetur jafnframt rekstraraðila til að fara að lögum því annars geta þeir búist við viðurlögum, t.d. sviptingu eða afturköllun rekstrarleyfis," segir í itlkynningu frá lögreglunni.