Segja ríkisstjórnina reyna að vinna stuðning Hreyfingarinnar

Þingmenn tókust á um hvernig ætti að fara með frumvarp stjórnlagaráðs um breytingar á stjórnarskránni á Alþingi í dag. Ríkisstjórnin var sökuð um að þrýsta málinu í gegn til að tryggja stuðning Hreyfingarinnar við stjórnina.

Í tillögu meirihluta stjórnskipunar- og eftirlitsnefndar Alþingis er lagt til að stjórnlagaráð verði kallað aftur saman í mars næstkomandi og þjóðaratkvæðagreiðsla um nýja stjórnarskrá fari fram í júní. Sjálfstæðismenn og Framsóknarmenn tóku tillögunni illa í þingsal í dag þegar síðari umræða um hana hófst og sögðu hana ekki þingtæka vegna mikilla breytinga í meðferð nefndarinnar.

„Og sú afsökun forseta, frú forseti að um sama heiti á tillögunni sé að ræða og það dugi til þess að hún sé þingtæk vísa ég á bug, það er ekki nóg að heitið eitt standi eftir," segir Vigdís Hauksdóttir, þingmaður Framsóknarflokksins.

„Hér er í öllum megin atriðum um nákvæmlega sömu þingsályktun að ræða og hún hefur verið unnin í samraði við alla flutningsmenn málsins svo ég bið menn að fara ekki með rangt mál," bætti hún við.

Gunnar Bragi Sveinsson sagði vera sannfærður um það að á endanum myndi ekki takast að breyta stjórnarskránni með þeirri aðferðarfræði sem væri verið að leggja upp með. „Því það er allt vont við þá aðferðafræði," sagði hann svo.

Össur Skarphéðinsson sagðist vera hissa á ræðum Framsóknarmanna. „Þetta mál varð til að þeirra frumkvæði. Þeir mynduðu heila ríkisstjórn í kringum það að breyta stjórnarskránni. Síðan hefur Framsóknarflokkurinn lagst hundflatur á eftir sjálfstæðisflokkurinn og lullar á eftir honum í öllum málum eins og þessum," sagði Össur.

Bjarni Benediktsson, formaður Sjálfstæðisflokksins, sagði að nú væri að koma í ljós að ráðherrarnir væru að berjast mjög fyrir því að Hreyfingin fengi þetta mál hér í gegn, „sem hlýtur að vera að menn hafi komist að fyrir jólin að því að ráðherrar myndu sjá til þess að málið fengi meðferð því það er skilyrði þess að halda ríkisstjórninni á lífi," sagði Bjarni og vitnaði þar til funda á milli Hreyfingar og ríkisstjórnarinnar á milli jóla og nýárs, þegar Hreyfingin var beðin um að verja ríkisstjórnina vantrausti.