Segir útlitið á eldsneytismarkaði svart

„Þetta sligar svo marga," sagði Runólfur Ólafsson, framkvæmdarstjóri FÍB, í viðtali í Reykjavík síðdegis á Bylgjunni í dag. Hann ræddi um hækkanir á eldsneytisverði.

„Hækkanirnar koma illa við almenning í landinu enda er eldsneyti einn stærsti kostnaður heimilanna," sagði Runólfur.

Runólfur og samstarfsmenn hans hafa fundað með efnahags- og viðskiptanefnd um hækkanir á eldsneytisverði. „Við höfum komið erindi á framfæri við stjórnvöld."

Hann segir að eldsneytisverð hafi hækkað upp úr öllu valdi á síðustu árum. „Ef við lítum fjögur ár aftur í tímann og skoðum eldsneytiskostnað venjulegrar fjölskyldu á hefðbundnum bíl þá var kostnaður hennar um 275.000 krónur á ári. Í dag, fjórum árum seinna, er sama fjölskyldan að greiða um 500.000."

Runólfur bendir á að fyrir fjórum árum hafi skattur í ríkissjóð vegna eldsneytissölu verið um 140.000 yfir árið. „Núna er skatturinn 240.000 krónur," sagði Runólfur.

Runólfur segir að ekkert bendi til að eldsneytisverði lækki á næstunni. „Þeir sem ganga lengst spá því að hráolían eigi eftir að hækka um 50% á árinu."