Yfirdráttarlán heimilanna jukust um tuttugu milljarða á sex mánuðum

Yfirdráttarlán heimilanna jukust um tæpa tuttugu milljarða síðustu sex mánuði ársins 2011. Íslendingar skulduðu að meðaltali um þrjú hundruð og tíu þúsund krónur í yfirdrátt um síðustu áramót.

Yfirdráttarlán eru ein dýrasta fjármögnun sem stendur heimilum til boða, en algengir vextir á slíkum lánum eru á bilinu ellefu til tólf prósent. Seðlabankinn birtir reglulega tölur um útlán banka, þar á meðal yfirdráttarlán heimilanna.

Hvernig sem á það er litið er ljóst að Íslendingar hafa verið að bæta verulega í yfirdráttinn á seinni hluta síðasta árs, eða lánin hafa verið uppfærð, en frá júlí og fram í desember hækkuðu þau um rúman þriðjung í tæpa 70 milljarða króna.

Það jafngildir því að hver fjárráða einstaklingur á landinu hafi verið með 313 þúsund króna yfirdráttarhala í upphafi þessa árs, og árlega vaxtabyrði upp á meira en 30 þúsund krónur.