Vill ræða veginn um Oddskarð á Alþingi

Sigmundur Ernir Rúnarsson, þingmaður Samfylkingarinnar fer fram á sérstaka umræðu á Alþingi um öryggi vegfarenda um Oddskarð, á milli Eskifjarðar og Norðfjarðar, eins fljótt og auðið er.

Í gær fór lítil rúta, með átta farþega innanborðs, út af veginum í Oddskarði og valt þrjár veltur. Mildi þykir að alvarleg slys hafi ekki orðið á fólki. Sigmundur Ernir bendir á að vegurinn sé flokkaður sem innanbæjarvegur, en liggi þó í 600 metra hæð. Hann sé samkvæmt nýrri úttekt í Læknablaðinu, hættulegasti vegur utan þéttbýlis á Íslandi, „en tengir eigi að síður saman þau byggðarlög sem leggja hlutfallslega lang mest til þjóðarframleiðslu Íslendinga."