Fleiri dómsmál þarf til þess að skera úr um vafaatriði með gengislánin

Bæði einstaklingar og fyrirtæki sem voru í skilum með gengislán, þrátt fyrir frystingar eða greiðslufresti, geta vænst þess að falla undir nýjasta gengislánadóminn, samkvæmt nýrri álitsgerð lögmanna. En þrátt fyrir víðtækt fordæmisgildi - telja menn að enn þurfi allnokkur dómsmál til að skera úr um vafaatriði.

Samtök fjármálafyrirtækja óskuðu eftir því við lögmenn Lex að fá frá þeim greinargerð um Hæstaréttardóminn sem féll í liðinni viku um að ólöglegt hafi verið að setja afturvirka seðlabankavexti á gengislán hjóna sem búa í miðbænum. Fjölmörg vafaatriði hafa sprottið í umræðunni um túlkun dómsins og fordæmisgildi hans fyrir aðra gengislánaskuldara.

Lögmenn Lex sendu þeir frá sér álitsgerð í dag og þeirra niðurstaða er í stuttu máli að allir sem eigi fullnaðarkvittun um greiðslur falli undir dóminn. Í öðru lagi að hafi fólk nýtt sér greiðslufresti, frystingar eða breytt lánum sínum - þá falli það undir dóminn, svo framarlega sem fólk var í skilum fram að breytingu.

Karl Axelsson, hæstaréttarlögmaður á LEX, telur hins vegar vafasamt að dómurinn nái yfir þá sem voru í vanskilum þegar lán þeirra voru fryst eða þeim breytt. Í þriðja lagi telja þeir að dómurinn nái yfir gengislán bæði fólks og smærri fyrirtækja

Ekki stendur til að reikna lánin upp að nýju út frá álitsgerðinni - enda telja lögmenn LEX að enn séu fjölmörg álitaefni sem skera þurfi úr fyrir dómstólum. Guðjón Rúnarsson, framkvæmdastjóri Samtaka fjármálafyrirtækja, segir að nú þegar séu mál í dómskerfinu sem bíði niðurstöðu sem gætu varpað ljósi á þessi vafaatriði. Hann segir hins vegar ekki ólíklegt að fara þurfi í fleiri dómsmál til að skera endanlega úr um örlög þessara lána. Karl Axelsson tekur í sama streng og efast um að menn hafi séð fyrir endann á málaferlum um stöðu gengislána.

Óvissunni um stöðu tugþúsunda gengislána fólks og fyrirtækja - mun því ekki linna á næstu dögum, nema því aðeins að Alþingi setji lög um nýja endurútreikninga.