Lögmenn komi sér saman um álitaefni í gengislánamálinu

Samtök fjármálafyrirtækja vilja að lögmenn allra hagsmunaaðila í gengislánamálinu, þar á meðal lánþega, komi sér saman um álitaefni sem reynt verður á fyrir dómstólum og hraðað þar í gegn svo hægt verði að eyða allri óvissu í málinu.

Samtök fjármálafyrirtækja létu lögmannsstofuna LEX vinna fyrir sig álitsgerð um nýfallinn hæstaréttardóm um gengislán. Þar kemur fram að bæði bæði einstaklingar og fyrirtæki sem voru í skilum með gengislán, þrátt fyrir frystingar eða greiðslufresti, geti vænst þess að falla undir dóminn. Samtökin telja þó að nokkur dómsmál þurfi til að hægt verði að skera út um öll vafaatriði. Þau vilja að hagsmunaaðilar komi sér saman um hvaða atriði þetta séu og láti reyna áþau fyrir dómstólum.

Guðjón Rúnarsson er framkvæmdastjóri Samtaka fjármálafyrirtækja. „Ef það fæst heimild frá Samkeppniseftirlitinu til að eiga samstarf um þau álitaefni sem ennþá eru uppi í frekari dómsmálum. Þá myndum við vilja sjá það gerast þannig að það kæmu þar að lögmenn í raun og veru allra hagsmunaaðila, það er að segja beggja hliða, bæði lánveitendanna og líka lögmenn lántakanna. Þeir færu svo yfir það hvaða álitefni það eru sem eru útistandandi, sem eftir er að fá úr skorið til að það verði hægt sé að gera þetta með fullri vissu um að við séum með endanlegar aðgerðir og reyna að hraða þeim málum eins og kostur er í gegnum dómskerfið," segir Guðjón í samtali við fréttastofu.