Bíða oft lengi eftir greiningu

Ráðgjafi hjá Krabbameinsfélaginu segir langan tíma oft líða frá krabbameinssjúklingar byrja að leita til lækna þar til þeir greinast. Mikilvægt sé að læknar séu vakandi fyrir því að leita að krabbameini en þriðji hver Íslendingur greinist með það einhverntímann á lífsleiðinni.

Rúmlega sextug sem greindist með alvarlegt krabbamein fyrir sex árum sagði sögu sína í fréttum okkar í gær. Hún hafði leitað til lækna í hátt í fjögur ár vegna slappleika áður en krabbameinið greindist. Hún var hvorki send í blóðprufur né rannsóknir fyrstu tvö árin og sagt að rekja mætti líðan hennar til breytingarskeiðsins. Þegar hún greindist þá var hún með krabbamein í nýrum, lungum, hálsi og víðar.

Hjá Krabbmeinsfélaginu þekkja menn margar sögur af fólki sem leitað hafði í lengri tíma til lækna með svipuð einkenni áður en það greindist með krabbamein.

„Það er oft að það er búið að vera þreytt lengi og finnur til slappleika og kannski svima og svona eins og rekja má í blóðleysi eða eitthvað þannig," segir Gunnjóna Una Guðmundsdóttir, félagsráðgjafi hjá Krabbameinsfélaginu.

Hún segir fólkið þó oft vera án verkja. „Ég held að það sé miklu algengara að fólk sé ekki farið að finna fyrir verkjum," segir hún. Flestir hafi yfirleitt leitað til lækna á heilsugæslum en ekki sérfræðinga.

„Fólk byrjar hjá heilsugæslustöðvum, hjá heimilislæknum, síðan ef það finnur einhver einkenni á ákveðnum stöðum í líkamanum þá fer það til sérfræðilæknis sem er kannski sérfræðingur í þeim einkennum."

Þá segir hún oft virðast sem svo að langur tími líði áður en fólk er sent í ítarlegar rannsóknir.

„Maður spur sig, afhverju fá sumir rannsóknir en ekki aðrir?" Hún segir mikilvægt að læknar séu vakandi fyrir því að leita að krabbameini. „Það ætti nú að hvarfla að þeim af því það er þriðji hver Íslendingur sem að greinist með krabbamein einhvern tímann á lífsleiðinni."