Neitar alfarið að hafa eignast barn: "Ég reyni bara að vera"

„Mér finnst enn þá mjög erfitt að skilja hvað gerðist," sagði Agné Krataviciuté þegar hún bar vitni í Héraðsdómi Reykjavíkur þar sem réttað er yfir henni fyrir að hafa orðið barni sínu að bana síðasta sumar.

Viðbrögð Agné virðast einkennast af afneitun, en hún neitar alfarið að hafa eignast barnið. Hún lýsti því þó fyrir dómi að hún hefði fundið fyrir miklum verkjum á hótelherberginu umræddan dag. Henni hafi blætt og mikill svimi sótt að henni. Hún neitar þó alfarið að hafa fætt barnið og að hafa veitt því hryllilega áverka, en hún er einnig ákærð fyrir að hafa skorið í munnvik kornabarnsins með hníf áður en hún kom því fyrir í ruslageymslu hótelsins.

Agné var róleg þegar hún bar vitni. Hún brast í grát þegar talið barst að móður hennar sem er búsett í Litháen. Hún lýsti því þannig að hún hefði orðið ástfangin af kærasta sínum, hætt námi í markaðsfræðum og farið til Íslands. Móðir hennar var afar ósátt við að hún hefði hætt námi.

Saksóknari spurði ítrekað um einkenni hennar þegar hún átti að hafa verið ólétt. Agné sagðist ekki kannast við breytingar á líkama sínum.

Að lokum spurði saksóknari hana hvort hún fyndi fyrir einhverri sektarkennd vegna barnsins, Agné svaraði því þá til að hún vissi ekki hvernig sér ætti að líða.

„Ég eignaðist ekki barn."

Saksóknari lyfti þá upp mynd af illa förnum líkama barnsins og spurði hvort myndin vekti einhverjar tilfinningar hjá Agné. Hún sýndi engin viðbrögð.

Verjandi Agné spurði hana samskonar spurninga. Að lokum spurði hann Agné hvernig henni liði.

„Ég reyni bara að vera," svaraði Agné. Túlkurinn hennar útskýrði þá orðin á ensku, „hún er að reyna að segja, I´m just existing."