Lögreglumenn styðja frásögn meints höfuðpaurs

Stærsta fíkniefnamál síðasta árs, Straumsvíkurmálið svonefnda, var tekið til aðalmeðferðar í dag. Þar báru tveir lögreglumenn að ekkert benti til þess að annar af meintum höfuðpaurum hefði vitað nokkuð af fíkniefnunum.

Alls eru sex ákærðir í málinu og komu þau öll fyrir dóm í dag. Um er að ræða smygl um borð í skipi sem kom frá Rotterdam og til Straumsvíkur í haust. Lagði lögreglan hald á tæp tíu kíló af amfetamíni, um átta þúsund e-töflur og mikið magn stera. Þar eru sex ákærðir.

Geir Hlöðver Ericsson er ásamt Sævari Sverrissyni ákærður fyrir að skipuleggja þennan innflutning. Þá greinir verulega á í vitnisburði sínum og benda hvor á annan.

Sævar hefur frá upphafi neitað því að hafa vitað að um sterk fíkniefni hafi verið að ræða, einungis hafi verið rætt um að pakkarnir innihéldu stera. Fyrir dóm í dag mættu tveir lögreglumenn sem stjórnuðu rannsókninni. Voru þeir báðir spurðir hvort eitthvað í gögnum málsins benti til þess að Sævar hefði vitað af sterku fíkniefnunum og sögðu þeir svo ekki vera. Hann hefði frá upphafi verið hreinskilin og samvinnuþýður og ekkert í umfangsmiklum hlerunum benti til þess að hann hafi vitað af fíkniefnunum.

Sævar er í gæsluvarðhaldi sem var framlengt í morgun á þeim grundvelli að aðalmeðferð væri að ljúka. Meðal þess sem liggur til grundvallar ákæru eru hleranir á síma og heimili Geirs Hlöðvers til sex mánaða. Ákveðið var í morgun að heimila sakborningum að hlusta á allar upptökur er að þeim lúta. „Ég tel að þetta hafi verið skynsamleg og góð ákvörðun hjá héraðsdómi," segir Vilhjálmur Hans Vilhjálmsson, verjandi Geirs Hlöðvers.

Þetta leiðir til þess að málið frestast um ótilgreindan tíma, en til stóð að aðalmeðferð myndi ljúka í vikunni.

Verjandi Sævars segist í samtali við fréttastofu hafa kært gæsluvarðhaldsúrskurðinn til Hæstaréttar.