Fyrrverandi ráðherra: Skömmin send til gerandans

„Skrif Árna endurspegla einhvern grundvallarmisskilning á eðli málsins sem mig grunar reyndar að sé harla almennur. Í stuttu máli er hann svona: Jón hefur reynt að biðjast fyrirgefningar margsinnis og svo er þetta óþægilegt mál fyrir alla sem ekki er við hæfi að vekja athygli á opinberlega."

Svona skrifar fyrrverandi þingmaður Samfylkingarinnar og umhverfisráðherra, Þórunn Sveinbjarnardóttir, á heimasíðu sína, þar sem hún fjallar um málefni Jóns Baldvins Hannibalssonar og ósiðleg bréf sem hann sendi barnungri frænku konu sinnar og Nýtt líf greindi frá í síðustu viku.

Á bloggi Þórunnar gagnrýnir hún Árna Gunnarsson, fyrrverandi alþingismann, þegar hann „ýjaði að því í Vikulokunum að umfjöllun um ógeðfelld og óviðeigandi bréfaskrif Jóns Baldvins Hannibalssonar til barnungrar stúlku gæti átt sér pólitískar rætur. Gyða Margrét Pétursdóttir brást eðlilega hart við þessum ummælum Árna, sem svarar henni í Fréttablaðinu í dag".

Þórunn skrifar að enginn getur krafist fyrirgefningar. „Hún er veitt af þeim sem fyrir óréttinum verður. Um fyrirgefninguna mætti skrifa mörg orð en þetta eru grundvallaratriðin í siðuðu samfélagi," skrifar Þórunn og bætir við:

„Guðrún Harðardóttir er að gera það eina sem hún gat í raun gert: Að senda skömmina þangað sem hún á heima. Til gerandans."

Hægt er að lesa blogg Þórunnar hér en greinar Árna og Gyðu Margrétar má finna í viðhengi hér fyrir neðan.