Vilja að stjórnlagaráð komi aftur saman

Stjórnlagaráð mun koma aftur saman í fjóra daga í næsta mánuði til þess að ræða tillögur um breytingar á stjórnarskrá. Tillaga þessa efnis var lögð fram í stjórnskipunar- og eftirlitsnefnd Alþingis í morgun. Nefndin mun funda með stjórnlagaráði þegar það kemur saman.

Valgerður Bjarnadóttir, formaður stjórnskipunar og eftirlitsnefndar, sagði við Vísi fyrr í vikunni að gert væri ráð fyrir að kosið yrði um tillögur nefndarinnar í júní. Þá er gert ráð fyrir að kosið verði samhliða forsetakosningum ef þær fara fram.

Samkvæmt heimildum Vísis er nú gert ráð fyrir að atkvæði verði greidd um tillögur stjórnlagaráðs og nokkur álitaatriði til viðbótar.