Bjargsigið í útrýmingarhættu, ekki svartfuglarnir

Það eru bjargsigsmennirnir og ævagamlar menningarhefðir sem eru í mestri útrýmingarhættu, en ekki svartfuglarnir, segir helsti sigmaður Vestmannaeyja, sem óttast að fimm ára veiðibann verði til þess að kunnátta og hefðir við eggjatöku glatist.

Á myndum Gísla Óskarssonar í fréttum Stöðvar 2 sjáum við Harald Geir Hlöðversson í bjargsigi en það hefur ekki þótt heiglum hent að nýta fuglabjörgin. Nefnd á vegum umhverfisráðherra hefur nú lagt til að veiðar á fimm tegundum svartfugla, og þar með eggjataka, verði bannaðar í fimm ár.

Haraldur Geir, sem er sigmaður Veiðifélags Bjarnareyinga, segir að slíkt bann myndi hafa gríðarleg áhrif í menningarlegu tilliti. Þeir séu aðeins örfáir orðnir eftir sem stundi þetta og ef einhverjir ,,fuglar" séu í útrýmingarhættu þá séu það þeir eggjakarlarnir. Þá sé hætta á að týnst geti sú hefð og kunnátta sem þeir hafi verið að færa á milli kynslóða.

Líklegt þykir að fuglabjörgin hafi verið nytjuð frá upphafi Íslandsbyggðar og frásögn Njálssögu af Þorgeiri skorargeir er úr björgunum í Eyjum. Viðurnefnið skorargeir hlaut Þorgeir þar sem hann fór um gilskoru í fuglabjargi.

Haraldur Geir segir Eyjamenn viðurkenna vandann og að lundinn sunnanlands hafi átt erfitt uppdráttar. Hann telur þó að staða lundans sé skárri en lýst hafi verið, vísar til svokallaðs pysjueftirlits Eyjamanna, og þá bendi margt til þess að hluti stofnsins hafi flutt sig norður í land í betra atlæti. Það sé því ekki alger dauði í þessu að þeirra áliti.

Haraldur Geir segir svartfugl njóta í raun náttúrulegrar verndar í hrikalegum björgum og veiðin sé orðin hverfandi. Þá kveðst hann ekki merkja slæmt ástand svartfugls í Bjarnarey en þar er langvían algengust á bjargsyllum. Hann skrifar ekki upp á að langvíunni hafi fækkað þar um 30%, allavega ekki á þeim bælum sem þeir hafi heimsótt árlega. Þar hafi staðan ekkert breyst.