Ekkju greiddar bætur þrátt fyrir að eiginmaðurinn reykti

Tryggingafélagið Okkar líftryggingar hf., var dæmt til þess að greiða ekkju fullar bætur vegna líftryggingar eiginmanns hennar sem lést árið 2010. Tryggingafélagið neitaði í fyrstu að greiða trygginguna og hélt því fram að hinn látni hefði vanrækt upplýsingaskyldu sína gagnvart félaginu í sviksamlegum tilgangi þegar hann svaraði því til, þegar hann keypti trygginguna, að hann reykti ekki. Þá upplýsti hann ekki um hjartalokugalla sem hann greindist með 7-8 árum áður en hann keypti trygginguna.

Maðurinn líftryggði sig árið1993. Þá hafði hann reykt í sirka 20 „pakkaár". Það er hann reykti einn pakka á dag í eitt ár. Hann var hinsvegar hættur að reykja þegar hann keypti líftrygginguna. Þá þurfti hann að svara spurningunni: „Reykir þú?"

Maðurinn svaraði neitandi, enda reykti hann ekki þá. Hann féll hinsvegar á bindindinu skömmu eftir að hann keypti trygginguna.

Tryggingafélagið leit svo á að maðurinn hefði vanrækt upplýsingaskyldu sína eins og fyrr segir. Þannig bauðst fyrirtækið til þess að greiða ekkju mannsins rúm 40% af tryggingunni, sem voru tæpar fimm milljónir króna.

Héraðsdómur Reykjavíkur komst hinsvegar að þeirri niðurstöðu að tryggingafélagið hefði eingöngu spurt hvort maðurinn hefði reykt þegar hann svaraði spurningunni.

Í niðurstöðu héraðsdóms segir: „Ekki voru á eyðublaðinu frekari beinar spurningar um reykingar t.d. hvort umsækjandi/tryggingartaki hefði reykt og ef hann hefði reykt en væri hættur hvenær hann hefði reykt síðast."

Við þetta bætir dómari svo: „Er þá einnig haft í huga, það sem alþekkt er, að þeim sem reykja og ekki síst þeim sem reykt hafa lengi og mikið gengur oft erfiðlega að hætta reykingum til lengi tíma litið, þótt þeim takist það oft um tíma. Virðist tryggingartaki hafa verið í þeim hópi".

Tryggingafélaginu er því gert að greiða ekkju mannsins fullar bætur, eða rúmar tólf milljónir vegna líftryggingarinnar.