Jón tapaði fyrir Persónuvernd - þarf að greiða 100 þúsund í málskostnað

Máli Jóns Magnússonar, hæstaréttarlögmanns og fyrrverandi þingmanns, gegn Persónuvernd var vísað frá Héraðsdómi Reykjavíkur í dag. Ástæðan var sú að Jón gat ekki sýnt fram á að hann ætti lögvarðra hagsmuna að gæta í málinu.

Jón stefndi Persónuvernd eftir að stofnunin óskaði eftir upplýsingum frá Seðlabanka Íslands um skráningu á persónuupplýsingar um gjaldeyrisviðskipti, þar á meðal hvernig vinnslu upplýsinganna væri háttað, hverjir hefðu aðgang að þeim, hvernig þær væru auðkenndar og hversu lengi þær yrðu varðveittar.

Í viðtali við Fréttablaðið í október á síðasta ári sagði Jón: „Persónuvernd heimilaði Seðlabanka Íslands að skoða kreditkortafærslur allra Íslendinga með tilliti til gjaldeyrisyfirfærslna. Það var gert án nokkurs lágmarks eða skilyrða. Ég tel að þarna sé brotinn réttur á mér með því að heimila óeðlilega hnýsni í mín einkamálefni."

Hann bætti svo við að hann vildi ekki að „Stóri bróðir" yrði með nefið ofan í öllum hans málum, og bætti við að hann myndi láta kalla seðlabankastjóra og fleiri fyrir dóminn til að gera grein fyrir málinu.

Það er ljóst að svo verður ekki. Hitt er þó ljóst að Jón þarf að greiða Persónuvernd hundrað þúsund krónur í málskostnað.