Samstaða á Patreksfirði: "Við munum ekki breyta um nafn"

„Það kemur svolítið á óvart að hún skuli velja akkúrat þetta nafn án þess að hafa samband við okkur. Ég fékk bara tölvupóst áðan frá félaga mínum sem sagði mér frá þessu," segir Haukur Már Sigurðsson, formaður Samstöðu á Patreksfirði.

Lilja Mósesdóttir kynnti í dag nafn á nýjum stjórnmálaflokki sem hún var að stofna. Flokkurinn fékk nafnið Samstaða, eins og fram hefur komið í fréttum í dag. Það vill svo til að stjórnmálasamtök með þessu nafni eru til. En þau eru á Patreksfirði.

Haukur Már er formaður Samstöðu á Patreksfirði en samtökin voru stofnuð fyrir fjórtán árum síðan, árið 1998, og hafa boðið fram í sveitastjórnarkosningum síðan þá. „Við vorum í meirihluta í bæjarstjórn síðast og erum með þrjá bæjarfulltrúa af sjö núna," segir hann.

„Ég er svolítið hissa að þau skuli velja þetta nafn án þess að hafa samband. Við erum ekkert tengd þessum stjórnmálaflokki," segir hann. Næstu skref segir hann vera óljós en hann ætlar að hafa samband við Lilju og ræða málið.

Og það kemur ekki til greina að Haukur Már og félagar breyti um nafn. „Við munum ekki breyta um nafn, þetta er okkar nafn. Við erum með ákveðið lógó og allt. Þetta er orðið 14 ára gamalt og við munum ekkert gefa eftir í þeim efnum," segir hann að lokum.