Mikilvægt að ná samstöðu um nafnið Samstöðu

„Grundvallaratriðið er að það er aðeins ein Samstaða," segir Sigurður Þ. Ragnarsson, varaformaður stjórnmálahreyfingarinnar Samstaða, flokkur um lýðræði og velferð. Þarna liggur einmitt kjarni málsins; hreyfingin heitir nefnilega líka flokkur um lýðræði og velferð.

Samstaða á Patreksfirði gagnrýndi nafnið harðlega í viðtali við Vísi í gærkvöldi. Þar sagði formaður Samstöðu á Patreksfirði, Haukur Már Sigurðsson, að hann og Lilja Mósesdóttir, formaður Samstöðu, flokksins um lýðræði og velferð, ætla að funda á næstu dögum og ræða nöfnin. „Það er nefnilega mjög mikilvægt að ná samstöðu um þetta mál," segir Sigurður og bætir við til útskýringar:

„Þegar sótt er um nöfn, hvort sem það eru fyrirtæki, stjórnmálahreyfingar eða félög, þá er sótt um hjá ríkisskattstjóra sem fer yfir öll gögn. Þar á meðal hvort eitthvað annað heiti sama nafni."

Það er því ljóst að það er aðeins eitt stjórnmálafélag sem heitir Samstaða. Það er á Patreksfirði.

Svo er reyndar til stéttarfélagið Samstaða líka. Það er á Blönduósi og Hvammstanga.

En svo er óumdeilt að það sé aðeins til ein stjórnmálahreyfing sem heitir Samstaða, flokkur um lýðræði og velferð. Og sá flokkur hyggst bjóða sig fram á landsvísu fyrir næstu þingkosningar.

Sigurður segir viðbrögðin við stofnun flokksins hafa verið gríðarlega góð. Næst tekur við fundur á Víkingakránni í Hafnarfirði klukkan átta í kvöld þar sem áherslur Samstöðu - flokksins um lýðræði og velferð það er að segja - verða kynntar.