Ólafur átti ekki að ráðstafa peningnum

Reykjavíkurborg hefur verið dæmd til að greiða Frjálslynda flokknum tæpar 6,8 milljónir vegna fjárframlaga fyrir árin 2008-2009 sem áttu að fara inn á reikning flokksins eftir að hann fékk einn mann kjörinn í borgarstjórn árið 2006.

Framlög fyrir árin 2008 og 2009 fóru hins vegar inn á reikning Borgarmálafélags F-lista, sem Ólafur F. Magnússon, þáverandi oddviti listans hafði stofnað. Ákvörðun Reykjavíkurborgar um að greiða peninginn inn á reikning Borgarmálafélags F-lista en ekki inn á reikning Frjálslynda flokksins var tekin að beiðni Ólafs sjálfs.

Héraðsdómur Reykjavíkur segir að einstakir frambjóðendur, sem stjórnmálasamtök hafa boðið fram við sveitarstjórnarkosningar, eigi ekki tilkall til þessa fjárframlags sem um ræði. Reykjavíkurborg hafi borið að greiða peninginn inn á reikning Frjálslynda flokksins.