Engin ákvörðun verið tekin um mál frjálslyndra

Kristbjörg Stephensen borgarlögmaður segir að engin ákvörðun hafi verið tekin um það hvernig bregðast skuli við Héraðsdómi Reykjavíkur frá því í gær.

Dómurinn dæmdi Reykjavíkurborg til að greiða Frjálslynda flokknum tæpar 6,8 milljónir vegna fjárframlaga fyrir árin 2008-2009 sem áttu að fara inn á reikning flokksins eftir að hann fékk einn mann kjörinn í borgarstjórn árið 2006. Peningurinn var aldrei greiddur til Frjálslynda flokksins heldur Borgarmálafélags F-lista sem Ólafur F. Magnússon borgarfulltrúi hafði stofnað eftir að hann yfirgaf Frjálslynda flokksins.

Kristbjörg Stephensen segir að dómurinn verði kynntur fyrir borgarráði á fundi sem fram fer á fimmtudag eftir viku. Eftir það verði hægt að taka ákvarðanir um það hvernig bregðast megi við honum.