Vopnað rán í Árbæ: Kynntist tálkvendinu á Netinu

Létt daður á Netinu þróaðist upp í vopnað rán í Árbæjarhverfi í gærkvöldi. Tilkynnt var um málið á ellefta tímanum í gærkvöldi og var aðdragandi málsins sá að húsráðandi hafði átt í sambandi við konu á Netinu um skeið, sem leiddi til þess að hún þáði heimboð til hans.

En skömmu eftir að hún mætti á stefnumótið virðist hún hafa hleypt inn manni, sem var grímuklæddur, og vopnaður hnífi. Hafði sá í hótunum við húsráðanda.

Lét fólkið greipar sópa um heimilið og hafði á brott með sér ýmsa muni og peninga af húsráðanda. Lögregla vill á þessu stigi ekki upplýsa hverju var rænt.

Húsráðandi brást rétt við og veitti ekki mótspyrnu og sakaði því ekki, en kallaði strax á lögreglu. Hann hafði aldrei séð konuna áður og veit í rauninni ekki hver hún er, aðeins hvernig hún lítur út, og ekkert er vitað um félaga hennar, enda var hann grímuklæddur.