Rændi tvær konur í miðbænum sama daginn

Nítján ára gamall piltur var í dag dæmdur í tólf mánaða langt fangelsi skilorðsbundið til þriggja ára fyrir rán, fjársvik, fíkniefnalagabrot og vopnalagabrot.

Maðurinn rændi meðal annars tvær konur í miðborg Reykjavíkur í apríl á síðasta ári. Önnur konan lenti í manninum á Laugaveginum. Hún var með tólf bjóra og páskaegg í poka þegar manninn bar að. Maðurinn huldi andlitið að hluta og ógnaði konunn.

Konan veitti í fyrstu mótspyrnu, en þá reiddi maðurinn höndina til höggs, sem varð til þess að hún gaf eftir, og maðurinn hafði pokann á brott með sér.

Sama dag veittist maðurinn að konu á Skólavörðuholti. Konan reyndi að flýja manninn sem veitti henni eftirför. Hann náði henni og hrifsaði tösku hennar. Konan reyndi að veita mótspyrnu en maðurinn náði töskunni að lokum, sem innihélt farsíma, sex þúsund krónur í reiðufé og greiðslukort. Konan hlaut áverka á hendi við atlöguna.

Fram kemur í niðurstöðu dómsins að með hliðsjón ungs aldurs mannsins þá skuli dómurinn vera skilorðsbundinn.