Vindhviðurnar náðu fellibylsstyrk

Vindur fór upp í 47 metra á sekúndu í vindhviðu að Hvammi, austan við Markarfljót í nótt, en það er aftakaveður eða fellibylsstyrkur.

Þá fór hviða upp í 42 metra undir Hafnarfjalli og í 37 metra á sekúndu á Kjalarnesi, þar sem bíll fauk út af veginum í gærkvöldi, en engan sakaði alvarlega.

Björgunarsveitarmenn aðstoðuðu ökumenn á Hellisheiði í nótt og voru einnig kallaðir út þegar vinnupallur við hús var að fjúka í Vestmannaeyjum.

Fyrri ferð Herjólfs var felld niður vegna ölduhæðar. Björgunarsveitir vour víðar í viðbragðsstöðu, þótt ekki hafi þurft að leita til þeirra.

Annars fór veður að lægja suðvestanlands undir morgun, en þá bætti í snjókomuna þannig að færð hefur spillst. Ekki er vitað um alvarleg óhöpp vegna veðursins, enda var sára lítil umferð samkvæmt talningastöðvum Vegagerðarinnar og fá skip á sjó