Í gæsluvarðhald fyrir íkveikju - ætlaði að brenna sýkla í burtu

Hæstiréttur Íslands staðfesti gæsluvarðhald yfir karlmanni sem hefur játað að hafa kveikt í íbúð sinni nærri Kleppsspítala 14. janúar síðastliðinn. Í úrskurði Héraðsdóms Reykjavíkur kemur fram að maðurinn hefði játað að hafa kveikt í íbúð sinni. Hann virðist hafa notað blöð og pappír og borið eld að pappakössum með bókum í.

Samkvæmt framburði kærða, þá kvaðst hann hafa bankað þrisvar á íbúðina við hliðina til athuga, hvort þar væri einhver áður en hann kveikti eld í íbúð sinni. Í kjölfarið hafi hann kveikt eld í íbúð sinni.

Maður lá sofandi í næstu íbúð en hann komst út eftir að starfsmaður Securitas vakti hann.

Maðurinn sagði það ekki hafa vakað fyrir sér að valda hættu, heldur frekar að þjóna almannahagsmunum með því að brenna sýkla, sem finna mætti í húsnæðinu og veggjum þess, en það var áður nýtt undir holdsveikraspítala. Maðurinn hefur hvorki gert grein fyrir því, að brýna nauðsyn hafi borið til þeirrar aðgerðar, né að hann hafi haft heimildir til slíkrar sótthreinsunar með íkveikju.

Með úrskurði Héraðsdóms Reykjavíkur hefur manninum verið gert að sæta geðrannsókn. Hann skal sæta gæsluvarðhaldi til 17. febrúar.